Fundacion Pro Lechi Mama Aruba
Our Main Sponsor:
30 Juni 2010
Siman Mundial di Lechi di Pecho:
“CUIDA LECHI DI PECHO, PASO PA PASO!”
“Cuida lechi di pecho: paso pa paso” ta e lema di e siman di Lechi di pecho
e aña aki. Tur aña WABA (World Alliance for Breasfeeding Action) ta dedica
e siman di 1 pa 7 di augustus pa pone atencion mundialmente na e
importancia di lechi di pecho. E aña aki WABA a scohe pa e tema di e “Baby
Friendly Hospital Initative”, cu ta un iniciativa pa pone atencion special na
stimula dunamento di pecho for di den hospital caba ora e mama duna lus.
Na Aruba Departamento di Salud Publico, Comision di Lechi Pecho,
conhuntamente cu Fundacion Pro Lechi Mama tambe ta para tras di esaki y
no kier laga e siman aki pasa sin dedica atencion na dje, aunque cu na
Aruba ta celebra e siman di lechi di Pecho den siman 40 hunto cu Hulanda
cu ta cay e aña aki dia 4 te cu 10 di oktober 2010.
Dunamento di Lechi di Pecho ta mustra algo facil ya cu e ta algo natural y
logico pa duna un baby. E ta natural berdad, pero no semper e ta bay
automaticamente bon for di principio. P’esey e base mester ta bon pa asina
e mama por wordo yuda optimalmente pa haci e dunamento di pecho un
exito.
“Cuida Lechi di Pecho, Paso pa Paso” ta percura cu:
1. Ta pone mas atencion pa contribui cu e 10 “vuistregels” pa logra
duna lechi di pecho exclusivo (6 luna lechi pecho so).
2. Entusiasmo nobo den henter e cuido di salud publico y comunidad
henter pa sostene y realisa e iniciativa pa mamanan duna nan yiu lechi di
pecho
3. Informacion pa un y tur tocante e echo cu e proteccion y sosten di
lechi di pecho ta e derecho di un mama y di e mucha – e ta derecho di e ser
humano.
4. E garantia cu tur esnan trahando den cuido materno-infantil ta bon
educa riba e tereno aki pa duna guia y sosten na e miho alimentacion pa e
baby.
5. E lema “Cuida Lechi di Pecho, Paso pa Paso” ta mustra cla cu hende
muhe mester custumbra paso pa paso cu dunamento di lechi di pecho, pero
tambe cu mester tuma paso pa realisa e bon cuido pa asina mantene e
calidad di cuido necesario na Aruba.
Cua paso esey ta? Keda pendiente, den siman 40 lo pone mas infasis riba
esaki pa asina tur hende por tuma e miho decision. Actualmente cu e
Comision di Lechi di Pecho bou guia di Departamento di Salud Publico
conhunto Fundacion Pro Lechi Mama cu ta traha duro pa esaki por wordo
realisa.
Bek pa pagina di Noticia
Noticia