Fundacion Pro Lechi Mama Aruba
Our Main Sponsor:
30 Juni 2010
Cu sumo placer Fundacion Pro Lechi Mama Aruba ta anuncia su lema nobo:
LECH’I PECHO, ALIMENTACION FOR DI CURASON!
For di dia cu Fundacion Pro Lechi Mama Aruba a nace na aña 2002 a hasi
uso di e lema: Lechi Pecho, Bo Yiu Su Derecho. Un lema cu ta mustra bon cla
e importancia di duna un baby e miho nutricion cu e por haya fo’i
nacemento. Na Aruba esaki a yuda trese cambio. Cifranan ta mustra cu mas
y mas mamanan na Aruba ta scohe pa duna nan yiu lechi di pecho. Algo di
apaudi! E lema a pega durante e 8 anjanan cu a pasa. Pero, lechi di pecho ta
ensera mucho mas cu solamente e derecho di e mucha. P’esei a dicidi pa
bin cu un campaña pa laga pueblo scohe un lema nobo.
E miembronan dinamico di e directiva di e fundacion a dedica un anochi pa
bin cu ideanan pa un lema nobo. Di e tantisimo ideanan a scohe 5 lema pa
participa den e campaña. Pro Lechi Mama a scohe dos dia pa laga pueblo
kies esun cu nan ta haya ta bisa nan mas. E prome actividad tabata e
Cyclovia na Noord. Pro Lechi Mama tabat’ei cu un stand pa duna
informacion. E otro actividad tabata un exposicion “Ami y mi cuido di mi
curpa!” na unda Pro Lechi Mama tabata presente tambe. En total casi 300
persona—di tur edad y nacionalidad—a participa na e campaña aki. Tur cu a
yuda scohe un lema a participa automaticamente pa gana un celular pa
cortesia di SETAR N.V. E resultado tabata lo siguiente:
1) Lech'i pecho, Alimentacion for di Curason (28%)
2) Lech'i pecho, Incomparabel y saludabel (20%)
3) Lech'i pecho, Pa e miho comienso (20%)
4) Lech'i pecho, Naturalmente di mes! (14%)
5) Lech'i pecho, Nunca di mas, Nunca di menos, Semper di mes! (12%)
Dialuna 7 juni den e programa "Nos Mainta" na Telearuba a saca e
ganadora, kende a keda den persona di sra. Blanca Maria Bustos Givaldo.
Aki por mira Blanca hayando su celular nobo di SETAR N.V.
Blanca ta un di esnan cu a vota pa e lema scohi. Combersando cune e ta
conta cu e ta apoya Pro Lechi Mama. E ta corda con e mes a bebe te cu 3
anja cerca su mama. El a wordo lanta cune den su cultura. E mes no ta
mama pero e tin 5 subrino. Nan tambe a ricibi te cu 2 aña lech’i pecho serca
nan mama. Blanca ta bisa cu tur hende na Aruba por sigui e bon ehempel di
su famia.
Nos di Fundacion Pro Lechi Mama ta gradici tur e casi 300 personanan cu a
yuda nos yega na nos lema nobo y ta contento cu Blanca a bira e ganadora
di e celular y cu e y su famia ta un bon ehempel pa tur futuro mama na
Aruba. Lechi pecho ta e yiu su derecho pero mas: Lechi di Pecho ta
Alimentacion for di Curason!
Riba e foto por mira e ganadora Sra. Bustos Givaldo cu Vice-Presidente di
Fundacion Pro Lechi Mama Sra. Minouche Lopez.
Bek pa pagina di Noticia
Noticia