Fundacion Pro Lechi Mama Aruba
Our Main Sponsor:
8 november 2007
Por fin … Awor dunamento di lech’i pecho ta un derecho!
Un ley nobo pa Aruba
Desde 1 di october 2007 un ley nobo a drenta na vigor cu ta duna un mama
e posibilidad pa interumpi su trabou pa percura pa su yiu haya lech’i pecho
durante e prome 6 lunanan di bida di su baby. E ley ta ensera cu un mama
tin e derecho di usa maximo 25% di su ora di trabou pa dia pa haci esaki. Pa
un mama cu ta traha 8 ora, esaki ta ensera un maximo di 2 ora pa dia.
Pues asina dunamento di lech’i pecho a bira un derecho di tur mama na
Aruba. E ley aki ta un logro grandi pa Aruba y Fundacion Pro Lechi Mama
tambe ta apoya e derecho aki, ya cu awendia mayoria di mama na Aruba ta
traha.
E recomendacion
Organisacion Mundial di Salud (OMS/WHO) y Organisacion Pan Americano
di Salud (OPS/PAHO) ta recomenda pa mamanan cria nan baby na pecho por
lo menos 2 aña, di cual e prome 6 lunanan exclusivamente cu lech’i pecho.
Asinaki percurando pa un crecemento y desaroyo optimal di nan yiu.
Dunamento di lech’i pecho ta un proceso natural, pero cu no ta bay
automaticamente semper bon.
Ora un mama ta traha
E cantidad di lech’i pecho ta keda stabil ora e mama por saca e lech’i pecho
cu frecuencia cada 3-4 ora. Si esaki no tuma luga e produccion di lech’i
pecho ta bira hopi menos, te hasta e pecho por stop di produci lechi. Y esaki
hopi biaha nos ta mira ora un mama bay traha bek.
E echo aki a keda comproba den e Encuesta Materno Infantil 2003. E
encuesta aki a saca afo cu hopi mama (12%) no ta cuminsa mes cu
dunamento di lech’i pecho pa motibo cu e ta traha. Ademas tin aun mas
mamanan (15%) cu si ta cuminsa duna lech’i pecho, pero ta stop mucho
trempan di duna nan baby lech’i pecho na momento cu nan tin cu bay bek
trabou. Esaki tabatin di haber kisas cu no ta tur mama ta haya e cooperacion
di nan doño di trabou pa haya liber pa duna nan yiu pecho of nan no ta sinti
nan mes comodo pa pidi cooperacion di nan doño di trabou pa haci esaki.
Cu e introduccion di e ley nobo aki na Aruba, ta bira mas facil pa un mama
logra e recomendacion di duna su yiu lech’i pecho manera mester ta!
Na hopi pais e ley aki ta na vigor pa hopi aña caba. Esaki no kiermen cu e ta
un fenomeno completamente nobo pa Aruba. Te cu awor cierto doñonan di
trabou tabata inclui e practica di dunamento di lech’i pecho den nan
maneho. Cu otro palabra, algun mama tabatin e posibilidad caba pa pomp
lech’i pecho na trabou of por ehempel ta bay cas pa duna e mucha lech’i
pecho den combinacion cu su lunch break. Tin varios caso caba di mama cu
a logra asina duna nan yiu lech’i pecho exclusivamente te cu 6 luna sin cu e
ley tabata na vigor. Pero awor, cu introduccion di e ley aki, lech’i pecho a
bira un derecho di tur mama y nan yiu!
Fundacion Pro Lechi Mama Aruba;
tel. 594-9678 / 593-4444/ 593-2682
Bek pa pagina di Noticia
Noticia