Fundacion Pro Lechi Mama Aruba
Our Main Sponsor:
3 october 2011
COMUNICADO DI PRENSA
FUNDACION PRO LECHI MAMA CU SU RETO LECH’I PECHO DIASABRA 8 DI
OKTOBER
Fundacion Pro Lechi Mama ta anuncia cu dia 8 di oktober lo e tene e su di
tres Reto Lech’i Pecho anual (tambe yama e Breastfeeding Challenge). E
evento aki lo tuma lugar diasabra 8 di oktober 2011 na Fantastic Gardens na
Bushiri, di 4:00 p.m.-6:00 p.m. Asina Aruba ta participe na e reto aki teni tur
aña mundialmente.
Pakico e “Reto Lech’i Pecho”? E reto aki ta mustra tanto mama como e
comunidad en general riba e importancia di dunamento di lech’i pecho,
tambe den publico. Aki na Aruba ainda sa sosode cu mamanan ta wordo pidi
pa bay sinta un banda ora nan kier cria nan yiu na pecho. Haciendo asina ta
haci parce manera dunamento di pecho ta algo cu mester sosode den
scondi. E mentalidad aki tin cu cambia! Dunamento di pecho ta un proceso
masha natural di cria un mucha chikito.
E aña aki e tema ta: “Papia cu mi! Lech’i Pecho–Un experencia 3-D”. E lema
aki ta enfoca riba e comunicacion na diferente nivel y den diferente sector
pa cu e dunamento di lech’i pecho. Comunicacion ta un parti esencial den
proteha, promove y apoya lech’i pecho. Nos ta biba den un mundo den cua
tur dia ta bin liñanan nobo di comunicacion acerca. Y nos por haci uso di e
canalnan di informacion aki pa amplia nos horizonte y plama informacion
tocante lechi materno. Lechi di pecho ta e miho alimento cu un mama por
duna su baby. Organisacion Mundial di Salud ta recomenda pa duna e baby
pecho so e prome 6 lunanan, y despues di introduci otro alimento saludabel,
sigui cu duna pecho te cu 2 aña of mas.
E Reto ta encera pa nos logra tin mas tanto mama posibel hunto na
Fantastic Gardens Aruba. Pa 5:00 di atardi ta pone tur yiu na pecho y nos lo
conta cuanto tin. E aña aki nos kier surpasa e cantidad di 30 baby na pecho!
Fundacion Pro Lechi Mama kier invita mamanan cu ta dunando nan yiu
pecho pa trece nan famia compelto pa bin pasa un atardi ameno hunto cu
nos. Lo bay tin “door prizes” masha bunita y practico pa mamanan
participante y lo no falta un sabroso y saludabel snack y djus pa tur!
E mamanan cu kier participa na e reto aki por inscribi via nos e-mail na
plm@prolechimama.com. Manda bo nomber, e-mail adres y number di
telefoon. Of tambe riba nos pagina riba Facebook. Inscripcion ta gratis. Asta
si bo no haya chens di registra, djis bini numa. Fundacion Pro Lechi Mama
Aruba ta conta cu boso participacion un biaha mas!
Fundacion Pro Lechi Mama ta gradici inmensamente su sponsornan pa e
evento aki, cu ta Fantastic Gardens, Manrique Capriles, Little Kingdom y
Taste of Belgium. Hopi danki pa e apoyo.
PLM kier recorda tur hende tambe riba e evento “Pink Ribbon” organisa riba
diadomingo 9 di oktober na Fantastic Gardens tambe pa concientisacion di
cancer di pecho. Corda: Ta proba cu mamanan cu a duna pecho tin un chens
hopi mas abou pa haya cancer na pecho.
Bek pa pagina di Noticia
Noticia