Fundacion Pro Lechi Mama Aruba
Our Main Sponsor:
24 September 2010
FUNDACION PRO LECHI MAMA TA ORGANISA SU DI DOS
“QUINTESSENCE BREASTFEEDING CHALLENGE”: TUR BABY TA CONTA!
PA LOGRA CU MAS TANTO MAMA DUNA SIMULTANEAMENTE NAN YIU
PECHO
Fundacion Pro Lechi Mama (PLM) ta anuncia cu diasabra dia 2 di oktober
2010 lo bay tene pa di dos biaha aki na Aruba e ‘Quintessence
Breastfeeding Challenge’, un reto pa mamanan duna simultaneamente lech’
i pecho. E evento aki lo tuma lugar na Wilhelmina Park for di 4 or di atardi
pa 6’or di atardi. Pakico un ‘Quintessence Breastfeeding Challenge’ awo?
Tur aña, durante e di 40 siman di aña, Pro Lechi Mama mescos cu diferente
otro pais rond mundo ta celebra e siman internacional di dunamento di lechi
materno, esta “World Breastfeeding Week” (WBW). E aña aki Fundacion
Pro Lechi Mama kier mehora e record di aña pasa cu ta para riba 24 mama
cu 26 baby na pecho. Mester menciona cu na 2009 21 pais a participa y
tawata tin 246 actividad. Un total di 4,766 baby a wordo conta
mundialmente. Algo cu lo haci su impacto y pa yuda conscientisa cu
dunamento di lech’i pecho ta algo normal den comunidad Arubano. Pa e
motibo aki PLM a dicidi di participa un biaha mas na e evento di
“Quintessence Foundation Breastfeeding Challenge” cu ta tuma lugar tur
aña na diferente pais rond mundo. E “Quintessence Breastfeeding
Challenge” ta enfoca riba e importancia di dunamento di lech’i materno pa
tanto mama como pa e comunidad en general. Pa mehora salud di mucha
mundialmente, un evento manera e ‘Challenge’ aki ta importante pa
conscientisa y educa comunidad henter riba e con y pakico e sosten pa cu
dunamento di lech’i pecho ta necesario. Hopi mama ta encontra
contratiempo pa wordo acepta pa loke ta trata dunamento di lechi materno
y hopi di nan ta pasa den momento dificil. Tin mama tin cu busca forsa un
skina, of bay sinta den auto y hasta bay den baño pa haci esaki na momento
cu e kier duna nan yiu lech’i pecho den publico. Haciendo asina ta implica
cu dunando un baby of un mucha lech’i pecho ta algo taboe y cu lo mester
sosode solamente den privacidad di bo cas. Y e mentalidad aki tin cu
cambia!!!
Nos lema pa e aña aki ta: Tur baby ta conta! E lema pa e reto ta enfoca riba
tur baby, cu tin e mesun derecho pa ricibi e miho comienso den nan bida,
esta di hayando lechi materno. E intencion di e reto ta pa logra cu mas
tanto mamanan duna nan yiu lech’i pecho hunto na Wilhelmina Park pa
asina forma parti di e conteo. Un peticion ta bay pa tur mama trese un
klechi y/of cusinchi pa asina duna su baby e pecho den un ambiente relaha
riba e yerbe . E mama mes por scohe si e kier drumi of sinta. Pa e rumannan
tin un skina special pa hasi actividad y tin un presentacion di poppenkast
tambe. Fundacion Pro Lechi Mama kier invita no solamente mamanan cu ta
dunando nan yiu pecho sino tambe tur hende cu kier duna nan sosten y
aporte na e evento aki pa asina yuda conscientisa cu dunamento di pecho
den publico ta normal atrobe! Pa e mamanan cu kier participa cu e
‘challenge’ por inscribi via e-mail na info@prolechimama.com. Manda bo
nomber, e-mail adres y number di telefoon. Tambe por yama na 593-2682 of
593-4444. Inscripcion ta gratis, esaki ta solamente pa nos sa cuanto mama
lo participa. Cada baby ta conta! Mamanan marca 2 di oktober 2010 riba
calender pa topa na Wilhelmina Park pa pone un record bunita di mama cu
ta duna yiu simultaneamente! E ta bay bira un evento ameno y yen di
sorpresa.
Bek pa pagina di Noticia
Noticia