Fundacion Pro Lechi Mama Aruba
Our Main Sponsor:
Noticia
20 Mei 2010
BABY WALK DI FUNDACION PRO LECHI MAMA A PONE HOPI HENDE RIBA
PIA!
Un grupo grandi di mas o menos 200 persona a participa na e prome
“Babywalk” di Fundacion Pro Lechi Mama, diasabra 15 di mei ultimo. Ta
famia completo a yega y tabata bunita pa mira riba caminda un cantidad di
strollers cu mucha chikito cu tambe por a participa di e forma aki. E tempo a
coopera, biento tabata fresco y solo a sconde tras di e nubianan cu a haci e
ruta pa cana 5 kilometer extra ameno banda di Eagle Beach. Minister Visser
y practicamente henter e team di e Ministerio di Salud y Deporte tambe a
participa. Fundacion Pro Lechi Mama ta masha contento cu gobierno ta mira
e importancia di lechi di pecho. Un baby cu haya lechi di pecho no tin
solamente probecho na chikito pero cifra ta mustra cu un mucha tin
beneficio na grandi tambe. Ta prueba cu muchanan cu a haya lechi di pecho
tin menos posibilidad di bira obeso na grandi. Minister Visser tin e problema
di obesidad na Aruba na pecho y a mustra su apoyo pa e iniciativa di e
“babywalk” y pa e trabounan cu Fundacion Pro Lechi Mama ta haci. Meta di
e babywalk tabata pa pone atencion riba lech’i pecho den forma di un
actividad saludabel pa asina recauda fondo. Y participando nan ta mustra
riba e importancia di e topico. P’esey Pro Lechi Mama a keda extra contento
di por a mira hopi cara conoci di mama cu nan yiu, cu e miembronan di Pro
Lechi Mama a guia den pasado. Den e forma aki nan a mustra nan apoyo.
Un danki ta bay specialmente na 9 “babywearing” mama’s, 1 “babywearing”
tata y un “babywearing” wela cu a cana 5 km cu nan yiu den un wrap of
sling. Di e forma aki nan hunto a cana 53 km en total y nan a recauda fondo
ya cu diferente compania a sponsor Pro Lechi Mama un suma pa cada
kilometer cu un mama carga su yiu. Un toke special ta cu dos mama a duna
pecho canando cu nan yiu den e wrap. Despues di e caminata tur
participante a haya fruta cu awa. Esaki a baha hopi bon y na final di dia por
bisa cu e Babywalk ta algo asina bunita cu peticion a drenta di biaha pa
organisa un “Babywalk” atrobe otro aña. Un mama cu kier a participa a
yama 24 ora despues y cu stroller dorna cu un banner “I love mommy’s milk”
y su baby bisti cu e t-shirt Lechi di Pecho mmmmmm……dushi!, pero mucho
laat. El a dicidi e ora ey pa participa na un otro caminata e dia siguiente pa
asina toch e demostra su apoyo na Fundacion Pro Lechi Mama. Un apoyo di
curason! Sin participante, apoyo y sponsors e evento aki no por a tuma
lugar. Un danki ta bay na tur e participantenan y companianan manera
Manpower4U, Mapotech, Pampers, de Veer & Son, Balashi, CC Holding,
Andina Ice, Demart Productions, Visser Holding,Talk of the Town, Aruba
Industrial Services, Superfood, Little Kingdom y Antraco. Tambe Paolo
Inocencia, Siomara Everon, Tito Lacle y Nilton Lacle a duna un bon
cooperacion. Sin laga afo un y tur cu a yuda di un of otro manera. Sin boso
ayudo e evento aki lo no por a bira un exito asina grandi.
Bek pa pagina di Noticia
